Maliyyə böhranı getdikcə böyüyür

dostuna gönder

azeroosaytlarım-a elave et

balaca yazı | esl yazı | böyük yazı

13 Okt,2008

ABŞ-da başlayan bu böhranın fəsadları artıq Avropa başda olmaqla, dünyanın bir çox ölkələrində özünü ciddi şəkildə büruzə verməkdədir.
Ötən gün dünya birjaları ortalama olaraq 5-10 faiz itkiyə məruz qalıb. Neftin bir barelinin qiyməti isə 77 dollara düşüb ki, bu da son üç ayda 50 faiz düşmə deməkdir. Dünən səhmlərin qiyməti ABŞ-ın Nyu-York birjasında 7, Yaponiyanın Tokio birjasında 9, Londonun Qiymətli Kağızlar Birjasında 7, Berlin birjasında 8, Paris birjasında 8, Madrid birjasında 7 faizdən çox aşağı düşüb. İstanbul Qiymətli Kağızlar Birjasında isə itki 7,7 faiz olub.
Böhran ABŞ-ın avtomobil sənayesindən də yan keçməyib. “General Motors” şirkətinin səhmləri bir gündə 31, “Ford”un səhmləri isə 20 faiz aşağı düşüb.
Neft sektorunun nəhəngləri sayılan “Exxon Mobile” və “Chevron” şirkətləri isə 13 faiz itki ilə üzləşiblər.
Qlobal böhrandan ən çox zərər çəkən ölkələrdən biri də Rusiyadır. Belə ki, böhranın baş verdiyi gündən bəri, rus sahibkarların ümumi itkisi 230 milyard dollar olub. Vladimir Lişin 22, Roman Abromoviç 20, Oleq Deripaska 16, Vahid Ələkbərov 7,2, Aleksey Mordasov 5,3, Dmitri Ribolovyev 4,1 və Aleksandr Lebedev 3,1 milyard dollar itirib. Dünən Rusiya birjası, ümumiyyətlə, dayanıb. Rusiya parlamentinin aşağı palatası olan Duma iqtisadi böhranın fəsadlarını aradan qaldırmaq və baş verə biləcək daha böyük təhlükələri önləmək üçün 86 milyard dollarlıq yardım paketinin ayrılmasını təsdiqləyib. Bundan əlavə, hökumət də əlavə tədbirlər görməyi planlaşdırır. Baş nazir Vladimir Putin dövlətin 175 milyard dollarlıq səhm alacağını açıqlayıb.
Cənubi Koreyanın Milli Bankı isə böhrandan çıxış yolunu maliyyə bazarına müdaxilə etməkdə görüb. Milli valyuta dollar qarşısında 5 faiz səviyyəsində dəyərdən düşüncə, Cənubi Koreya hökuməti bazara müəyyən miqdarda dollar buraxıb.
Yaponiya maliyyə bazarı ilk itkisini verib. Belə ki, fərdi sığorta hesabı 10 milyard dollar olan “Yamato Life İnsurance” adlı sığorta şirkəti iflas etdiyini açıqlayıb.
Vəziyyətin gərginləşdiyini görən ABŞ Prezidenti Corc Buş Amerika xalqına müraciət edib. O, dövlətin vəziyyətə nəzarət etdiyini bildirərək, narahatçılığa ciddi əsas olmadığını vurğulayıb: “ABŞ-ın əlində qlobal böhranların aradan qaldırılmasına dair bir neçə mexanizm var və bu mexanizmlər artıq fəaliyyətdədir”.